ҚАЗАҚФИЛЬМ АМЕРИКАДА

Ш. Айманов атындағы «Қазақфильм» ұлттық киностудиясы әлемдегі ең ірі кино және теленарықтардың бірі American Film Market (AFM) 2025 қатысты. Биылғы AFM Лос-Анджелестегі Fairmont Century Plaza алаңында өтіп, жоғары кәсіби белсенділігімен ерекшеленді: шараға 35-тен астам елден келген 285 компания-экспонент қатысты, ал барлық көрме алаңдары толықтай сатылып, офлайн форматқа деген тұрақты қызығушылықтың қайта оралғанын көрсетті.
«Қазақфильм» ұлттық киностудиясының стендінде отандық кинематографияның кең ауқымды топтамасы ұсынылды. Экспозицияға классикалық шығармалармен қатар заманауи көркем, деректі және анимациялық фильмдер енгізілді. Сондай-ақ Ұлттық киноны қолдау мемлекеттік орталығының жобалары онлайн және офлайн каталогтар арқылы таныстырылып, іскерлік кездесулер барысында таратуға арналған материалдар ретінде ұсынылды. Келушілер киностудияның өндірістік қуатымен, техникалық және шығармашылық әлеуетімен танысуға мүмкіндік алды.
Кинонарық жұмысыаясында АҚШ, Канада, Еуропа, Азия және Таяу Шығыс елдерінің телеарналары, сейлс-агенттері және контент-платформалары өкілдерімен бірқатар іскерлік кездесулер өтті. Талқылаулардың негізгі бағыттары қазақстандық контентті халықаралық алаңдарға шығару, көркем фильмдер, сериалдар және деректі жобалар бойынша бірлескен копродукциялық серіктестіктер орнату, сондай-ақ білім беру бағдарламалары мен питчинг-сессияларға қатысу болды. Бұдан бөлек, халықаралық контент алмасу және отандық киножобаларды жаһандық медиаэкожүйеге селбестіру мүмкіндіктеріне ерекше назар аударылды.
«Қазақфильмнің» AFM 2025 шарасына қатысуы қазақстандық киноны халықаралық аренада ілгерілетуге, кәсіби байланыстарды кеңейтуге және жаңа серіктестік мүмкіндіктерін ашуға жасалған маңызды қадамдардың бірі болды. Ұлттық киностудия алдағы уақытта да халықаралық әріптестікті дамыту, бірлескен жобаларды жүзеге асыру және отандық кинематографияның әлемдік деңгейдегі позициясын нығайту бағытындағы жұмысын жалғастырады.