Tatler Kazakhstan «Қазақфильм» киностудиясы туралы эксклюзивті бейнематериал жариялады

Алматы, 14 шілде 2025 ж. — Қазақстандағы сән, мәдениет және өмір салты бағытындағы жетекші медиа алаң — Tatler Kazakhstan Шәкен Айманов атындағы «Қазақфильм» киностудиясына арнайы келіп, оның өндірістік әлеуеті мен шығармашылық тынысын көрсететін бейнематериал жариялады.

Бейнероликте киностудияның негізгі цехтары мен ішкі бөлімдері — өндірістік процесс, дубляж студиясы, фонотека, дыбыс жазу цехы және киноқор кеңінен қамтылды. Түсірілім барысында әр бөлімнің мамандары өз бағыттары бойынша сұхбат беріп, кино өндірісінің көпшілік біле бермейтін маңызды тұстарымен таныстырды.

«Кино – көрерменге жеткенге дейін ұзақ жолдан өтеді. Біз көріністің артындағы еңбекті, дыбыстың тазалығын, әр кадрдың үйлесімділігін ойлаймыз. Tatler түсірген бұл материал – көрерменді сол процестің ішіне жетелейтін әдемі мүмкіндік», — дейді дубляж студиясының маманы.
Фонотека бөлімінің қызметкері:

«Біздің бөлімде мыңдаған сағаттық архивтік дыбыс сақталған. Бұл — ұлттық кино мұрасының алтын қазынасы. Осындай дүниелерді насихаттап, танытуға атсалысып жатқан Tatler-ге алғысымыз шексіз».

Tatler Kazakhstan ұсынған бұл жоба «Қазақфильмнің» ішкі әлемін, шығармашылық қызметін және кәсіби үдерістерін заманауи аудиторияға ұсынатын ерекше формат болды. Көрермен бейнематериал арқылы тек студияны аралап қана қоймай, отандық кинематографияның тереңдігін сезіне алады.

Tatler Kazakhstan — сән, мәдениет пен шығармашылық индустриядағы жаңалықтарды насихаттайтын беделді медиа бренд. Бұл жолы олардың назары — ұлттық кино өнерінің жүрегіне ауысты.

Бейнематериал Tatler Kazakhstan-ның ресми сайтында және әлеуметтік желілерінде жарияланды. Жоба көрермендер тарапынан жоғары қызығушылық тудырып, жылы пікірлерге ие болуда.