«Алтын адам» анимациялық фильмі Иорданияда өткен IV Халықаралық балалар кинофестивалінен жеңіспен оралды.

26.08.2025

«Алтын адам» анимациялық фильмі Иорданияда өткен IV Халықаралық балалар кинофестивалінде көрермен көзайымы жүлдесін иеленді.

2025 жылдың 21 тамыс күні
Шәкен Айманов атындағы «Қазақфильм» ұлттық киностудиясының Қазақстан Республикасының Мәдениет және ақпарат министрлігінің тапсырысымен, Ұлттық киноны қолдау мемлекеттік орталығының қолдауымен түсірілген «Алтын адам» анимациялық фильмі Амман қаласында (Иордания) өткен IV Халықаралық балалар кинофестивалінде (Jordan Children’s Film Festival) «Көрермен көзайымы» жүлдесіне ие болды.
Фестивальді Иорданияның Корольдік кино комиссиясы (Royal Film Commission – Jordan) ұйымдастырды. Ол 2025 жылғы 15–21 тамыз аралығында, Жәлилә бинт Әли ханшайымның қамқорлығымен өтті. Ауқымды мәдени шараға әлемнің түкпір-түкпірінен келген балалар мен жасөспірімдерге арналған ең үздік фильмдер ұсынылды.
Байқау бағдарламасында Қазақстан, Қытай, Нидерланды, Латвия және басқа да елдердің фильмдері көрсетілді. Қазақстандық «Алтын адам» фильмі жас көрермендердің ерекше ықыласына бөленіп, «Көрермен көзайымы» жүлдесін жеңіп алды.
Иорданиядағы балалар кинофестивалі – аймақтағы балалар мен жасөспірімдерге арналған фильмдерге ерекше көңіл бөлетін санаулы алаңдардың бірі. Оның бағдарламасына көркем және анимациялық фильмдер көрсетілімдерімен қатар шеберлік сабақтары мен шығармашылық кездесулер енді.
«Қазақстандық анимацияның халықаралық аудитория тарапынан осылайша жоғары бағалануы – біз үшін үлкен мақтаныш. «Алтын адамның» табысы – ұлттық анимациямыздың әлемдік деңгейде бәсекеге қабілетті екенін дәлелдейтін маңызды қадам», – деп атап өтті «Қазақфильм» киностудиясының басшылығы.
Қазақстандық фильмнің халықаралық аренада жоғары марапатқа ие болуы – ұлттық анимацияның дамуына тың серпін беріп, Қазақстан мен Таяу Шығыс елдері арасындағы мәдени ынтымақтастықты нығайта түседі.
Сондай-ақ қараңыз
Новость 1
01.01.2025
ТОЛЫҒЫРАҚ
01.01.2025
Новость 2
ТОЛЫҒЫРАҚ
Новость 3
01.01.2025
ТОЛЫҒЫРАҚ
01.01.2025
Новость 4
ТОЛЫҒЫРАҚ